Marrëdhëniet tregtare ndërmjet Raguzës dhe shqiptarëve gjatë periudhës osmane nën dritën e disa autorëve

Abstrakti

Artikulli synon të jetë si hyrje e shkurtër në studimet rreth
marrëdhënieve ndërmjet shqiptarëve dhe Republikës së Raguzës gjatë
periudhës osmane. Në artikull trajtohen shkrime të botuara nga
autorë të ndryshëm, të cilat kanë një rëndësi të veçantë në lidhje me
historinë e marrëdhënieve ndërmjet Republikës së Raguzës dhe
shqiptarëve kryesisht gjatë shek. XVI-XVIII. Artikulli paraqet disa
rezultate paraprake në lidhje me kërkimin, gjurmimin dhe gjetjen
qoftë të dokumenteve, qoftë të punimeve të ndryshme. Këtu po
paraqesim disa autorë të rëndësishëm të kësaj teme studimore, pjesa
më e madhe e këtyre studiuesve janë sllavë, kryesisht kroatë. Ndër
emrat e rëndësishëm të këtyre studiuesve mund të përmendim Josip
Luetić, Vuk Vinaver, Bogomil Hrabak, Vinko Ivančević etj. Në artikull
synohet të jepen qasjet kryesore që autorët në fjalë i bëjnë kësaj teme
në këta artikuj.