LEZHA NË MESJETË

Abstrakti

Lezha është një ndër qytetet më të vjetra shqiptare. Ajo ka qenë një vendbanim i fortifikuar që në kohët prehistorike me gjurmët në Majën e të Shëlbuemit, dhe për të ka të dhëna historike të shumta edhe për periudhën e Antikitetit, por në këtë artikull do të ndalemi në historinë mesjetare të këtij qyteti.
Siç vërejnë me saktësi medievistët Konstantin Jireçek dhe Milan Shuflaj, në Mesjetë, Lezhën e gjejmë nëpër dokumente me emra të ndryshëm. Nëpër dokumentet serbe këtë qytet e hasim me emrin Ljesh (Lješ), tek ato bizantine (në katalogët e peshkopëve, tek Konstantin Porfyrogennetos dhe Anna Komnena) Elissos, nëpër dokumente mesjetare të shek. XIII-XV e ndeshim me emrat latinë Lessium (Lexium, Lessum) edhe Alexium, Alessium, dhe në italisht Alessio.