RIORGANIZIMI I XHANDARMËRISË SHQIPTARE (1925-1928)

Abstrakti

Xhandarmëria, si pjesë e rëndësishme e forcave të armatosura të shtetit shqiptar në vitet 1925-1939, ka tërhequr pak vëmendjen e historiografisë shqiptare. Ndaj në këtë artikull është bërë objekt trajtimi riorganizimi i xhandarmërisë në vitet 1925-1928. Pikërisht në këto vite u hodhën hapa të rëndësishëm për reformimin dhe konsolidimin e institucioneve shtetërore, për krijimin e legjislacionit shtetëror dhe zbatimin e ligjshmërisë në jetën e veprimtarinë shoqërore ku padyshim xhandarmëria luajti rol të rëndësishëm. Në situatën në të cilën ndodhej vendi në fund të dhjetorit 1924, ku ishte cenuar rëndë rendi dhe qetësia publike, padyshim midis faktorëve ndikues për gjendjen e vendit, edhe xhandarmëria kishte përgjegjësitë e saj.