QEVERIA E FAN NOLIT NË OPTIKËN E DIPLOMACISË BRITANIKE

Abstrakti

Zhvillimet politike të qershorit të vitit 1924 i dhanë goditje të rëndë
jetës parlamentare, pluralizmit dhe demokracisë në Shqipëri. Ngjarjet e
qershorit 1924 ishin një kryengritje antiqeveritare, në të cilën mori pjesë
ushtria dhe grupe të ndryshme të opozitës. Roli i ushtrisë ishte parësor
dhe do të ishte jo e saktë që t’iu jepej përparësi rolit të forcave civile të
rekrutuara prej disa krerëve të opozitës. Qershori i vitit 1924 përmbysi
përfundimisht sistemin politik të krijuar nga Kongresi i Lushnjës dhe i
hapi rrugën zhvillimeve kaotike në politikën shqiptare.