HASAN PRISHTINA NË LËVIZJET POLITIKE (1920-1924)

Abstrakti

Atdhetari Hasan Prishtina ka hyrë në historinë e shqiptarëve me një
veprimtari të gjerë politike, diplomatike, ushtarake, duke skalitur emrin në
plejadën e luftëtarëve të paepur të lëvizjes kombëtare çlirimtare të shqiptarëve.
Atë nuk e joshën gradat, ofiqet dhe postet për ta larguar nga veprimtaria e tij
revolucionare. Ai qëndroi në pozicionin e opozitarit të përjetshëm kundër të
gjithë armiqve të kombit shqiptar. Siç e ka deklaruar vetë “në vend të një
kolltuku me turp në Stamboll preferoi kryengritjen me nder në malet e
Kosovës”. Dhe Kosova e çështja e çlirimit të saj, si pjesë e pandarë e kombit
shqiptar do të bëhej lajtmotivi i të gjithë veprimtarisë së Hasan Prishtinës, deri
në fund të jetës së tij.