KONTRIBUTI I DETARËVE SHQIPTARË NË ZBULIMET E MËDHA GJEOGRAFIKE (SHEK. XV-XVI)

Abstrakti

Edhe pse shqiptarët janë një popull që gëzon një pozitë strategjike, duke pasur dalje në dy nga detet më të rëndësishme të Mesdheut Qendror, atyre u është atribuar një rol i kufizuar në historinë detare të Mesjetës. Në fakt, bëhet fjalë më tepër për një perceptim, që buron nga mungesa e studimeve specifike mbi marrëdhëniet e shqiptarëve me detin. Përndryshe, dokumentacioni jo i pakët provon se shqiptarët janë të pranishëm në historinë detare jo vetëm të Mesdheut por edhe të Atlantikut dhe të Europës Veriore që në Mesjetën e Vonë, në të njëjtën kohë me popullsi të tjera me traditë detare.