GJUHA, SHKOLLA E KOMBËSIA NË SHQIPËRINË E POSHTME NË SHEK. XIV-XVIII

Abstrakti

Në krahun jugor të Shqipërisë, në atë që rëndom është quajtur “Shqipëria e Poshtme”, dukuritë kulturore, e në këtë kuadër edhe kultivimi i gjuhës shqipe, kaluan nëpërmjet një procesi posaçërisht të vështirë, sidomos pas shek. XV. Këtu, pushteti osman dukej më i stabilizuar dhe efektet e disfatave të rënda që Perandoria Osmane filloi të pësojë në frontin e Danubit, pas shek. XV, ndjeheshin më pak se në viset më në veri. Dy pushtetet e mëdha të kohës me ndikim vendimtar, Porta e Lartë dhe Patrikana e Stambollit, nuk i njihnin për shqiptare popullsitë e asaj treve të gjerë dhe i përfshinin ato, sipas besimit fetar, në entitete të tjera kombëtare.