A. ZOGU SIPAS OPINIONIT TË PËRFAQËSUESIT BRITANIK NË SHQIPËRI, HOXHSON DHE POLITIKA E TIJ NDAJ SHQIPTARËVE NË JUGOSLLAVI SIPAS DISA DOKUMENTEVE TË MP TË JASHTME TË SHQIPËRISË

Abstrakti

Për “Mbretin e shqiptarëve”, Ahmet Zogun, nuk është folur e
shkruar pak. Por në shumë raste kur është përmendur, mandej edhe në
artikuj e monografi që i kushtohen tërësisht atij, zakonisht vlerësohet
maksimalisht ose akuzohet e denigrohet rëndë. Edhe në përpjekjet që
janë bërë për ta portretizuar me realizëm, rëndom vërehet një pozicion i
paracaktuar. Subjektivizmi nuk mungon as në biografinë e shkurtër të A.
Zogut, të përgatitur në vitin 1935 nga përfaqësuesi britanik në Shqipëri,
Hoxhson (Hodgson), për t’ia relatuar Forin Ofisit. Natyrisht, për një
diplomat të karrierës si Hoxhsoni, tiparet e Mbretit të shqiptarëve janë
skicuar jo vetëm në bazë të impresionove personale, por edhe duke
gjykuar brenda kuadrit të linjave të përcaktuara të politikës britanike për
kohën në Shqipëri, në Ballkan e më gjerë. Gjithsesi curriculumi që
Hoxhsoni i bën A. Zogut, ka origjinalitet dhe meriton vëmendje. Ai
ndihmon për të kompletuar pikëpamjet dhe vlerësimet e ndryshme rreth
njërit prej personaliteteve më të spikatur të historisë sonë.