RRETH TRAJTIMIT TË ÇËSHTJES SHQIPTARE NË JUGOSLLAVI NË RRAFSHIN BALLKANIK (pas vitit 1945)

Abstrakti

Çështja e shqiptarëve në Jugosllavi, përkatësisht çështja e Kosovës, çështja e shqiptarëve në Maqedoni, në Malin e Zi dhe në jugun e Republikës së Serbisë në periudhën pas Luftës së Dytë Botërore, padyshim, është pjesë e çështjes shqiptare në tërësi, prehistoria e afërt e së cilës zuri fill në vitin 1913, me copëtimin e njohur drastik të trojeve shqiptare. Këtu nuk po llogarisim shfaqjen e pjesshme të kësaj çështjeje në vitet e mëparshme, ku do të vlente të përmendej, në dekadën e tetë të shekullit të XIX, pushtimi, aneksimi dhe spastrimi etnik i sanxhakut të Nishit nga gati e gjithë popullsia shqiptare.