Ngjarjet e vitit 1990: Shteti komunist shqiptar përballë fundit të pashmangshëm

Abstract

“Këshilli i Ministrave të RDGJ-së (Republikës Demokratike
Gjermane) me rekomandim të Byrosë Politike, ka vendosur që qytetarët e
RDGJ mund të shkojnë në Republikën Federale dhe në Berlinin
Perëndimor me banim të përhershëm apo për vizitë të përkohshme
private pa marrë rrugën indirekte nëpërmjet vendeve të tjera, si Hungari,
Poloni apo Çekosllovaki”1. Ky ishte njoftimi që do të botohej në Zërin e
Popullit, organ i Komitetit Qendror të Partisë së Punës së Shqipërisë
(PPSH) të nesërmen e shembjes së Murit të Berlinit, më 10 nëntor 1989.
Po me këtë gjuhë lakonike dhe duke dhënë sa më pak detaje do të
jepeshin dhe lajmet për rënien e komunizmit në Poloni, Çekosllovaki,
Bullgari e Rumani. Megjithatë shqiptarët u informuan për revolucionet në
Evropën e Lindjes Komuniste nëpërmjet medieve të huaja, si me pamjet
ngazëlluese të shembjes së Murit të Berlinit, por edhe me ato makabre të
revolucionit në Rumani. Era e ndryshimeve kishte përfshirë Lindjen, por
në Shqipëri ende nuk po ndjehej asgjë.