TENDENCIOZITETI IDEOLOGJIK MARKSIST-LENINIST I SHKOLLËS SHQIPTARE (1966-1970)

Abstrakti

Vitet 1966-1970, përfaqësojnë periudhën gjatë të cilës u iniciua
“Reforma e re” për “revolucionarizimin e shkollës”, e cila la aq shumë
pasoja në ecurinë e mëtejshme të të gjithë sistemit të edukimit shqiptar.
Mishërimi i plotë i ideologjisë marksiste-leniniste në gjithë
veprimtarinë mësimore-edukative të shkollës dhe brenda këtij kuadri,
pasqyrimi në dokumentacionin e saj, do të rishfaqej si një nga problemet
komplekse pa zgjidhjen e të cilit nuk mund të garantohej ecuria e
“reformës” së re. Nisur nga kjo optikë, zhvillimet në këtë drejtim u
vlerësuan si “një nga punët më serioze” dhe fushë e rëndësishme ku
konkretizohej “politika e PPSH”, qëllimi dhe programi i saj”.
“Programet, - do të tërhiqte vëmendjen E.Hoxha, - kanë rëndësi
vendimtare për shkollat e çdo kategorie. Për çdo lloj shkolle që do të
përcaktohet duhet të bëhen programe të diferencuara dhe të rishikohen
ose të hartohen tekstet përkatëse”.