ASPEKTE TË GJENDJES SË NACIONALIZMIT SHQIPTAR GJATË VITEVE 1916-1918 NË ZONËN E PUSHTIMIT AUSTRO-HUNGAREZ

Abstrakti

Lufta e Parë Botërore “e preku në zemër zhvillimin” e shtetit dhe të nacionalizmit shqiptar, sepse Shqipëria u kthye në shesh lufte e ushtrive të ndryshme. Shteti kombëtar shqiptar, i cili filloi të ngrihej me shumë mundime u shpërbë aq shpejt sikur të mos kishte ekzistuar më parë. Kjo i dha një goditje të rëndë aspiratave të nacionalizmit shqiptar, pasi shqiptarët mbetën në mëshirën e fatit. Qysh në fillim të luftës, qeveritë e të dy koalicioneve ndërluftuese u përpoqën të preknin ndjenjat kombëtare të shqiptarëve, me qëllim që të gjenin mbështetje për ushtritë e tyre në pjesën perëndimore të Ballkanit.