MARRËDHËNIET E NDËRSJELLA TË MINORITETIT GREK ME QEVERINË KOMUNISTE SHQIPTARE (1944-1945)

Abstrakti

Vera e vitit 1944 paralajmëroi problemet me të cilat do të përballeshin marrëdhëniet shqiptaro-greke pas Luftës së Dytë Botërore. Kthesa në favor të Aleatëve të Kombeve të Bashkuara, që mori situata ndërkombëtare si rezultat i fitoreve të Ushtrisë së Kuqe në Frontin e Lindjes dhe zbarkimi aleat në Normandi u dha mundësi shteteve të Ballkanit Perëndimor të mendonin për të ardhmen e tyre. Të njëjtën gjë po bënin dhe Bashkimi Sovjetik dhe Britania e Madhe, të cilat që në maj të vitit 1944 kishin filluar përpjekjet për të arritur një marrëveshje mbi ndarjen e “zonave të përgjegjësisë së përkohshme në Ballkan”. Sipas kësaj ndarje Bashkimi Sovjetik do të përqendronte vëmendjen në Rumani, ndërsa Britania e Madhe në Greqi.