DISA TË DHËNA PËR ESAT PASHË TOPTANIN NË FONDET E ARKIVIT DIPLOMATIK ITALIAN (1915-1916)

Abstrakti

Arkivi Diplomatik dhe Historik i Ministrisë së Punëve të Jashtme të Italisë ruan një pasuri të jashtëzakonshme dokumentare, që ndriçon e plotëson sa ngjarjet dhe figurat historike kombëtare italiane, aq edhe ato ballkanike e më gjerë, pa përjashtuar këtu edhe ato shqiptare. E ndodhur gjeografikisht afër Shqipërisë, Italia, një nga gjashtë fuqitë e Koncertit Evropian, në vitet e Luftës së Parë Botërore nuk i fshihte më interesat e drejtpërdrejta territoriale ndaj fqinjit të saj, të vogël e të varfër. Ky konstatim i jep dokumenteve të arkivit të mësipërm një rëndësi të madhe në shkrimin e historisë së shqiptarëve përgjatë Luftës së Përbotshme.