DISKUTIMET SHQIPTARO-BRITANIKE PËR ÇËSHTJEN E SHKOLLAVE TË MINORITETIT GREK GJATË VITIT 1935

Abstrakti

Në vitet 1933-1934, qeveria shqiptare ndërmori një reformë
arsimore për forcimin e karakterit kombëtar të arsimit, e cila përfshiu
edhe shtetëzimin e të gjithë shkollave private në vend nga qeveria
shqiptare. Ky shtetëzim u shtri edhe në shkollat private të minoritetit
grek, çka krijoi një tension të ri në marrëdhëniet me Greqinë. Çështja më
tej ju referua Lidhjes së Kombeve dhe Gjykatës Ndërkombëtare të
Drejtësisë në Hagë. Në fund të janarit 1935, qeveria shqiptare ra dakord
që të kërkohej një opinion nga Gjykata e Përhershme Ndërkombëtare
lidhur me masat që ajo kishte marrë për mbylljen e shkollave private
minoritare dhe zëvendësimin e tyre me shkolla publike, ku mësimet
jepeshin në gjuhën greke me tekste të botuara kryesisht në Greqi. Në
prill të vitit 1935, Gjykata e Hagës dha opinionin me shumicë votash(8
kundër 3) që shkollat private minoritare të lejoheshin sërish.