FIGURA E BAJRAM CURRIT NË HISTORIOGRAFINË SHQIPTARE

Abstrakti

Personalitetet apo figurat hyjnë në histori dhe renditen në faqet e saj, sipas rolit, pozitiv apo negativ, që kanë luajtur për të ardhmen e një vendi, të një kombi, apo edhe më gjerë. Ka figura që përmenden dhe vlerësohen në histori për rolin e tyre negativ, të tjerë për rolin e tyre pozitiv, si luftëtarë të vendosur në fushën e mbrojtjes së të drejtave politike dhe të zhvillimeve ekonomike e shoqërore. Ndër këta të fundit një vend të veçantë dhe të nderuar zë Bajram Curri. E në çfarë veprimtarie nuk e gjen të pasqyruar figurën e Bajram Currit, në historiografinë e të dy pjesëve të kombit shqiptar, të ndarë politikisht më 1913.