Zyrtarizimi i gjuhës shqipe në përputhje me Marrëveshjen Kornizë të Ohrit

Abstrakti

Në këtë artikull, objekti i trajtimit do të jetë mënyra e zyrtarizimit
të gjuhës shqipe, në përputhje me Marrëveshjen Kornizë të Ohrit (MKO),
me të cilën u vendosën kornizat e përdorimit të gjuhës shqipe në rrugë
zyrtare. Çështja e zyrtarizimit të gjuhës shqipe ishte mjaft e ndërlikuar
për shqiptarët që jetojnë në Maqedoni. Ligjet e aprovuara përmbanin
lëshime dhe mangësi evidente, që ishin rezultat i një rezistence të palës
maqedonase ndaj kësaj çështjeje. Diskriminimi i ushtruar ndaj
shqiptarëve për një periudhë të gjatë ishte i tmerrshëm, ndërsa përdorimi i
gjuhës shqipe shkoi në nivele më të ulëta, saqë preku edhe toponimet e
qyteteve dhe të vendbanimeve të tjera që duhej të shqiptoheshin sipas
natyrës së gjuhës maqedonase, me qëllim shtypjen e shqiptarëve dhe
asimilimin gjuhësor e kulturor të tyre. Pala maqedonase në asnjë mënyrë
nuk pajtohej me faktin se gjuha shqipe mund të përdorej lirshëm nga
qytetarët shqiptarë të kësaj republike.