POLITIKA EKSPANSIONISTE E ITALISË NDAJ TERRITOREVE SHQIPTARE NGA FUNDI I SHEK. XIX DERI NË FILLIM TË SHEK. XX

Abstrakti

Ky artikull analizon politikat ekspansioniste të Italisë ndaj territoreve shqiptare nga fundi i shek. XIX deri në fillim të shek. XX, duke u përqendruar tek interesat strategjikë italianë në Adriatik dhe Ballkan. Përmes shqyrtimit të burimeve historike italiane dhe shqiptare trajtohen përpjekjet diplomatike, kulturore dhe ushtarake për të siguruar ndikim mbi Shqipërinë, duke përfshirë mbështetjen e institucioneve arsimore, klerin katolik, komitetet “pro Albania”, si edhe konkurrencën me Austro-Hungarinë. Studimi thekson rolin e rivalitetit austro-italian në formësimin e kësaj strategjie. Ky rivalitet u shfaq veçanërisht në fushën fetare dhe arsimore, duke u pasqyruar në numrin e madh të shkollave që qeveria italiane financoi në këtë periudhë në qytetet shqiptare, si edhe në funksionimin e zyrave postare e konsullore, si dhe në marrëdhëniet tregtare.