REAGIMI I KLERIT KATOLIK DHE VATIKANIT NDAJ MIRATIMIT TË KODIT TË RI CIVIL NË VITET 1928-1929 (SIPAS BURIMEVE DIPLOMATIKE ITALIANE)

Abstrakti

Në kuadër të reformave me karakter oksidental, por edhe për nevojat emergjente me të cilat po përballej shoqëria shqiptare në vitet 20-të, ishte parë e domosdoshme që të ngrihej një grup pune me juristë të afirmuar, për të hartuar një Kod të ri Civil. Ky shihej si një projekt emancipues, i cili do ta fuste popullin shqiptar në rrugën e zhvillimit evropian dhe do të shkëpuste përfundimisht ndikimin e legjislacionit osman. Aplikimi i Mexhelesë (Kodit Civil Osman), tashmë konsiderohej i tejkaluar. Ndërtimi i një aparati shtetëror modern, nën shembullin e vendeve evropiane, nuk mund të kuptohej pa hartimin e një korpusi juridik bashkëkohor.