RRYMAT POLITIKE BRENDA KOMITETIT “MKK” DHE POZICIONI I HOXHA KADRI PRISHTINËS

Abstrakti

Komiteti “MKK” (1918-1924) është cilësuar nga autorë të ndryshëm si qeveria e Kosovës në mërgim, truri i organizatave kombëtare shqiptare etj., për periudhën e viteve të para pas Luftës së Parë Botërore.
Edhe pse deri sot ndër studiuesit nuk ka dilema për kontributin e kësaj organizate në mbrojtjen e të drejtave të popullsisë shqiptare në Kosovë dhe në viset e tjera shqiptare, duke e përfaqësuar denjësisht atë, si edhe në zhvillimet e brendshme politike në Shqipëri që ndikuan në konsolidimin dhe demokratizimin e shtetit shqiptar, pak është studiuar përtej vështrimit global për të evidentuar rrymat e ndryshme politike brenda Komitetit “MKK”, të shfaqura dukshëm veçanërisht që nga viti 1920, si edhe individët që i përfaqësonin ato.