VËSHTRIM ANALITIK MBI PROCESIN E VENDOSJES SË MARRËDHËNIEVE DIPLOMATIKE MES SHQIPËRISË DHE SHTETEVE TË BASHKUARA TË AMERIKËS (1922-1926)

Abstrakti

Kontakti i emigrantëve shqiptarë me “botën e re” në fund të shek. XIX, shënon fillesat e miqësisë midis popullit shqiptar dhe atij amerikan, e cila konkretizohet në vitin 1922 me njohjen e qeverisë shqiptare nga SHBA dhe vendosjen e marrëdhënieve diplomatike midis dy shteteve. Kjo ishte një kurorëzim i përpjekjeve, sakrificave, investimeve morale dhe materiale të personaliteteve, shoqërive, organizatave shqiptare dhe amerikane si dhe të vullnetit të mirë të qeverive respektive. Të gjithë këta komponentë nuk do të kishin kuptim jashtë sfondit historik të kësaj periudhe.