VENDOSJA E MARRËDHËNIEVE SHQIPTARO-TURKE GJATË VITEVE 20’ TË SHEKULLIT TË KALUAR

Abstrakti

Pas Shpalljes së Pavarësisë Shqipëria, në marrëdhëniet me Turqinë,
pati një shkëputje disavjeçare. Lufta e Parë Botërore, solli si rrjedhim, jo
vetëm shkatërrime për të dy vendet por edhe ndryshime në pozitën e tyre
ndërkombëtare. Shqipëria në përfundim të saj duhej të ndërtonte shtetin
dhe të forconte identitetin kombëtar, kurse Perandoria Osmane tanimë e
dobësuar, duhej të paguante borxhet dhe llogaritë e shekujve. Fatet e tyre
vendoseshin nga Konferenca e Paqes në Paris dhe nga dëshirat dhe
interesat e shteteve fituese. Ecuria e punimeve të Konferencës i kishte
bërë shqiptarët të mendonin se nuk kishte shpresa që diplomacia e Fuqive
të Mëdha do të zgjidhte çështjen shqiptare sipas interesave të tyre.