FAMILJET FISNIKE TË DRISHTIT MESJETAR

Abstrakti

Në këtë artikull nuk pretendoj të jap një pasqyrë të plotë të familjeve më të rëndësishme të qytetit mesjetar verior Drisht, por të paraqes disa nga ato, të cilat kam mundur të gjej deri më sot në kuadër të hulumtimeve të mia në lidhje me historinë e këtij qyteti. Fakti që gjatë këtyre hulumtimeve, në lidhje me historinë e këtij qyteti po has gjithnjë e më tepër në familje të tjera të panjohura më parë për mua, më bën të jem modest dhe ta quaj këtë artikull si një pasqyrë të paplotë, megjithëse numri i familjeve që do të merren në shqyrtim nuk është i vogël.