VILAJETI I JANINËS PËRBALLË HELENIZMIT

Abstrakti

Vilajeti i Janinës shtrihej në pjesën perëndimore të njësisë administrative osmane të Rumelisë. Ai u krijua në vitin 1867 në kuadrin e reformës administrative që kishte përfshirë Perandorinë Osmane që prej vitit 1864. Me riorganizimin e bërë vilajeti përfshinte në gjirin e tij pesë sanxhaqe: të Janinës me kazatë Janinë, Paramithi, Filat, Mecovë, Konicë e Leskovik; të Prevezës me kazatë Prevezë, Artë, Pargë dhe Margëllëç; sanxhakun e Gjirokastrës me kazatë Gjirokastër, Pogon, Përmet, Delvinë, Himarë dhe Tepelenë; Sanxhakun e Beratit me kazatë Berat, Vlorë, Skrapar, Tomoricë dhe, sanxhakun e Larisës me kazatë Larisë, Volo, Trikallë, Elasonë.