SINKRONI E KRIMEVE SERBE NË MORAVË TË EPËRME (SHTATOR-DHJETOR 1913): Përkufizim i shkurtër gjeodemografik e administrativ i Moravës së Epërme dhe i krimeve serbe kundrejt shqiptarëve në fillim të shek. XX

Abstrakti

Morava shtrihet në lindje të fushës së Kosovës e në veri të maleve të Karadakut dhe ndahet në dy pjesë: Morava e Poshtme dhe Morava e Epërme. Kjo trevë gjeografike ka marrë këtë emërtim sipas homonimit-hidronimit Morava, që rrjedh nga malet e Karadakut, përkatësisht në jug të Vitisë. Kjo hapësirë gjeografike përfshin vendbanimet e Karadakut, një pjesë të Gallapit, Zhegocit dhe Novobërdës. Morava e Epërme shtrihet në pjesën juglindore të Kosovës, në shpatet veriore të Karadakut të Shkupit, duke përfshirë luginën e lumit Morava. Kufizohet me Gjilanin, Ferizajn, Kaçanikun dhe Maqedoninë.