NGA PEZULLIMI I PARLAMENTIT TË KOSOVËS NË PËRPJEKJET PËR KONSTITUIMIN E REPUBLIKËS SË KOSOVËS (1990)

Abstrakti

Mbretëria e Jugosllavisë, e krijuar me Paqen e Versajës në vitin 1919, si një miniperandori për të mbrojtur interesat e disa shteteve të mëdha, gjatë gjithë ekzistencës së saj, pra edhe si RSF e Jugosllavisë, deri në shthurjen e saj në vitin 1991, u ballafaqua me probleme të mëdha. Pas përfundimit të Luftës së Dytë Botërore ajo i përballoi këto probleme falë interesave të Fuqive të Mëdha dhe ndarjes së botës në sfera të interesit dhe në blloqe. Josip Broz Tito, kryetar i Jugosllavisë, arriti të ruajë shtetin me lojën e bashkekzistencës paqësore dhe pa u angazhuar në blloqe. Mirëpo, problemet nuk ishin zgjidhur, vetëm ishin gulfatur dhe shtyrë për më vonë. Më të rëndat ishin: Bosnja dhe Hercegovina si subjekt politik dhe etnik, ndarja e saj në mes të Serbisë dhe të Kroacisë, si dhe problemi i shqiptarëve në Jugosllavi, në përgjithësi dhe ai i shqiptarëve të Kosovës, në veçanti.