NACIONALISTËT MATJANË NË LUFTËN PËR ÇLIRIM KOMBËTAR (1939-1944)

Abstrakti

Të gjithë ato forca apo individë që u udhëhoqën nga ideja e çlirimit kombëtar gjatë Luftës së Dytë Botërore do të identifikohen, në këtë trajtesë, me emrin nacionalistë. Pra, nacionalistët matjanë përfshijnë të gjitha ato forca e resurse njerëzore, që me veprimet e qëndrimet e tyre i kontribuan çështjes së çlirimit të Shqipërisë dhe më tej, çlirimit kombëtar.
Pushtuesi italian, së bashku me dislokimin e forcave dhe të teknikës ushtarake në Shqipëri, ushtroi një propagandë intensive, për t’i larguar shqiptarët nga ballafaqimi me të. Veç të tjerave, ai mori masa me synimin, që qëndrimi i shqiptarëve të mos merrte nxitje nga stomaku për të reaguar kundër pushtuesit.