DR. ILIANA ILIEVA: ÇËSHTJA SHQIPTARE (1908-1912) PËRMES KËNDVËSHTRIMIT TË DIPLOMATËVE BULLGARË1, Muzeu Kombëtar i Bullgarisë, Sofje: 2013, 448 f.

Abstrakti

Në të dyja dekadat e para të shek. XX, kontaktet kulturore dhe politike ndërmjet shqiptarëve dhe bullgarëve janë zhvilluar me ritme të shpejta. Në Bullgari kanë ardhur informata të shumta për shqiptarët nga burime të ndryshme – nga shkencëtarët bullgarë, të cilët i kanë hulumtuar trojet lindore shqiptare në këtë periudhë; dokumentet e organizatave revolucionare bullgare dhe sidomos të VMORO-s, kujtimet e kryetarëve të saj vazhdojnë të jenë një burim i çmueshëm për historinë e Lëvizjes Nacionalçlirimtare Shqiptare nga kjo periudhë; me shumë rëndësi janë edhe dokumentet dhe arkivat e Ekzarkisë Bullgare, e cila e kishte shtuar ndikimin e saj në fillim të shek. XX në disa vise, të banuara edhe me shqiptarë etj.