PËRPJEKJA E PERANDORISË OSMANE PËR TË STABILIZUAR SITUATËN NË VISET SHQIPTARE: KOMISIONI I REFORMAVE I HAXHI ADIL BEUT (SHKURT-PRILL 1912)

Abstrakti

Në fillim të vitit 1912, popullsia shqiptare e vilajeteve të Kosovës,
Shkodrës, Manastirit dhe Janinës gjendej në një situatë të vështirë
ekonomike, politike dhe shoqërore. Shqiptarët manifestuan gjithnjë e më
tepër një pakënaqësi në rritje si ndaj angazhimit të pakët të qeverisë për
zbatimin e marrëveshjes së një viti më parë, ashtu edhe ndaj masave
ekonomike me taksa të larta që bëheshin të papërballueshme, çarmatimin
e popullsisë, shërbimin e detyruar ushtarak si dhe ndaj administratës.