REFORMA ARSIMORE E REALIZUAR N PERIUDHN E MBRETRIS SHQIPTARE (1928 – 1939)

Abstrakti

Rilindasit tanë të mëdhej, që demonstruan një shkallë të lartë idealizmi për të zgjuar dhe ngritur lart ndërgjegjen kombëtare, ëndërruan dhe punuan për shkollën shqiptare, për organizimin dhe mbarëvajtjen e saj. Ata ishin të bindur se ringritja e shtetit shqiptar mbas qindra vitesh robërie do të sigurohej jo vetëm me pushkë por edhe me penë. Shkolla kombëtare shqiptare ku mësimi dhe edukimi i brezit të ri do të bëhej në gjuhën tonë të bukur do të shërbente si institucioni themelor fillestar për të përgatitur armatën e intelektualëve që do të drejtonin shtetin e ri shqiptar. Ajo do të kishte si tipar themelor edukimin patriotik të nxënësve, duke siguruar kështu bazat për mobilizimin e tyre të mëvonshëm e të suksesshëm që në vendin tonë të krijohej shteti i ri i shqiptarëve në familjen e madhe të vendeve europiane. Shkolla jonë do tu mësonte të rinjve shqiptarë gjuhën tonë që na mban të bashkuar dhe na vllazëron. Ajo duhej të ishte laike, e shkëputur nga kleri fetar dhe ndikimi i tij, që mund të sillte përçarje në kushtet e vendit tonë ku kishim tri besime të ndryshme fetare.